Дили ман то кунун ба ҳоли гулҳое месӯзад, ки рӯйи дастонам интизори ту хазон шуданд...
***
Моҳу Офтоб чашмони модарони моянд, ки дар ғаму ташвиши мо- фарзандон даме нахобанд.
***
Бархӯрди чашмони мо гуфтугӯи дилҳоямон буд.
***
Дунё аҷиб аст, одамони ақлдор ҳам барои пул гул мефурӯшанд.
***
Аҷабо, оташ бо ҳама қудрат, ки дорад, боз аз об метарсад.
***
Чаро аз хотира менолему аз ақл не?
***
Дареғо, ҳар қадар ки хатои худро зуд дарк кунем, ҳамон қадар тез фаромӯш мекунем.
***
Ҷоми майкадаро чандин бор шикастаам, лек мекӯшам, ки ҷоми дили дӯстонро нашиканам.
***
Шӯълаи субҳ моро бедор мекунад, то дар хоби абад намонем.
***
Сангро об сӯрох мекунад, санги дилро ғам.
***
Шаршараҳои кӯҳ-ҷомҳои лабрези табиат, кокулони парешони духтаронро мемонад, ки як умр ман ошиқи онҳоям.
***
Модар-Замин маъвои ҷовидонии мост. Дар батни модар пайдо мешавему ба батни замин меравем.
***
Барои дилро холӣ кардан бояд ба қабристон рафт, чунки он ҷо ҳама гуфтаҳоятро хомӯш гӯш мекунанд.
***
Дӯст аз душман чӣ фарқ дорад?
Дӯст ҳол мепурсаду душман ҷон!
***
Шоир ишқзадааст, агар ишқзада нест, шоир нест.
***
Агар ба кӯрчашме ҳамнишинӣ ҳеҷ боке нест, агар бо кӯрдиле ҳамнишин шавӣ- вой бар ту!
***
Агар дил дорӣ, дилдодаӣ,
Дилдодагӣ – дилеро обод кардан аст.
***
Гавҳораву Тобут: яке рамзи зиндагиву дигаре рамзи марг.
Зиндагиву марг паҳлӯи ягдигаранд.
***
Гарчи Шамъу Чароғ ҳарду равшанӣ доранд, дар шӯълаи Шамъ рӯзгори мози намоён аст.
***
Ман зодаи Замину Осмон ҳастам, вале чун онҳо ҷовидон нестам.
***
Ман аробаи худро барои он худам мекашам, ки фарзандам аробаи набераамро накашад.
***
Ҳарчанд ман бар қоғазу қалам ғолиб будан мехоҳам, лек ҳар ду аз ман пирӯзтаранд
***
То кай дар сояи дигарон мегардӣ, соядор бош, ки шиносандат.
✍? РАҲИМШОҲ ШАРИФЗОДА
Шарҳҳо
Тақвим
« Май 2024 » | ||||||
---|---|---|---|---|---|---|
Пн | Вт | Ср | Чт | Пт | Сб | Вс |
1 | 2 | 3 | 4 | 5 | ||
6 | 7 | 8 | 9 | 10 | 11 | 12 |
13 | 14 | 15 | 16 | 17 | 18 | 19 |
20 | 21 | 22 | 23 | 24 | 25 | 26 |
27 | 28 | 29 | 30 | 31 |